بلدنا بالمصري: احنا بلطجية وبنحرض على الشرطة

محكمة جنايات السويس ومقرها التجمع الخامس لأسباب أمنية، كانت بتحاكم النهاردة 14 من المتهمين بقتل الثوار قدام شرطة الأربعين في السويس أيام الثورة: 10 ظباط وصاحب معرض وولاده التلاتة.. دفاع المتهمين قال إن الشهدا مسجلين خطر وسوابق وعليهم احكام.. والمحكمة قررت تأجيل القضية ليوم 14 سبتمبر وعلينا وخير واخلاء سبيل كل المتهمين بكفالة 10 آلاف جنيه لكل واحد.. هو الحكم اتنطق من هنا وعينينا ما تشوف إلا النور وقامت الدنيا وما قعدتش.
لكن يمكن يكون اللي برد نار الأهالي مش بس أهالي الشهدا، أهالي مصر كمان، إن النائب العام المستشار عبد المجيد محمود، ما كدبش خبر وطعن على الحكم في ساعتها، والمفروض غن الطعن دة ينظر خلال 48 ساعة قدام دايرة تانية من دواير محكمة جنايات السويس غير الدايرة اللي بتنظر في القضية، حسب تصريحات المستشار عادل السعيد، النائب العام المساعد والمتحدث الرسمي باسم النيابة العامة.