De Speyerer Dom - Deutschland - UNESCO Weltkulturerbe

De Speyerer Dom (uff pälzisch: Schpayra Dum) is die Kathedral vum Bischdum Schpayer. Es is die greeschd romanisch Kaerich uf de gonzi Weld un die Parrkaerich vun de Mariä-Himmelfaard-Dumparrai. Lischt vum Inhalt Gschichd Oogfange hot dn Schpayra Dum de saalsche Kaisa Kunrad II, deselwe, wu -- wie mer on de Limbursch lese konn -- am selwe Morsche es Kloschder Limbursch gegrind hot. Er wolld de weldgröschde Dum iwwahaubd baue. Die Hischdoorischer sache, es weer um die 1030 gewäsd. Oigewaihd worre is de Dum awwä erschd anno 1061 vum Konrad saim Enggl Hainrisch IV. Awwer däm hod dä Bau ned gfalle un do hoddan schun noch 20 yaahr glai wieda umbaue geloßd: Es Middlschiff hod schdad nere flachi Holzdegg ä nachlnaiis Graizgrad-Gewölb griechd, die Oschdääl hodda ummoddle geloßd un auße hodda die Zwäschgalerie druffsedze geloßd. Die Tirm hen aach nai gemachd werre misse, awwe druzdäm is 1106 alles fäddisch gewäßd, es woa de greeschde Bau vum gonze Owendlond: 134 m lang un 33 m hoch. On Woihnachde 1146 hoddä Bernard vun Clairvaux, Abd vun de Zischdärziensa, midnärä woddgewaldisch Bredischd de Kenisch un ä paa dausnd Riddar fer de zwädde Graizzuch geworbe. Alle Gebott hoddä Dum gebrennd, awwees Schlimmschde waa anno 1689, wie em XIV Luui sai Marodöre im Griesch um die Pälzer Äbbfolsch die gonz Kuapalz vun vunn bis hinne un graiz un gwea oogebrännd un bladd gemachd hen. Do hen ses gonze Weschdwääg weschgschbrengd, die gonze Bedder un all des Zaisch, wu die Laid nai gebrung hen, wail se geglaabd hen, doo weas sischa, des hen se abgfaggld un nunnegebrännd bis uf die Maure. Erschd in de Midd vum achdzehnde Yaahrhunnert hods Geld gelongd fer widder uffzebaue. Des hod donn em Neumanns Baldasaa soin Eldschder, de Franz Ignaz Michael, iwwanumme un in fainschdm Barock ausgfiad, sogaa mid zwää Obelisge voa die Egge. Awwer es hod ned long guudgeduun, wie die fronzeesisch Rewoluzion kumme is, hodde Mob getobt un grad widder alles pladd gemachd. De Napoleon hod don soi Geläsch un soi Pead un dännä iia Fudda do noigschdelld. 1806 hod de Dum sogaa abgeriß wern solle, awwer do waa de Määnzä Bischof Joseph Ludwig Colmar davoa. Erschd nodäm daß die Palz zu Bayan kumme is, hod de Kenisch Max de Dum als Bischofskersch herrichde un nai waihe geloßd. De Wäschdbau vun haid is 1854-1858 vun Hainrich Hübsch gebaud worre. De Kenisch Ludwisch I hod donn den Johann vun Schraudolph inne alles mid Nazarena-Fresge ausmale geloßd. Die greeschd Reschdaurierung is schließlisch 1957 oogfang worre. In äänzelne Edabbe sin die nazarensche Fresge ausm 19. Yaahrhunnert foadkumme, die Pailer mid Bedong ausgschbrizd worn, die Beede diefa gelechd worre uf ija ald Niwo, die Fassade sin wida romanisch und iwwahaubd is meglischd alles wieda wie orischinal. 1971 sin die Awaide fäddisch gewesd. Awwee schun 1996 gings vun naijem loos: De Dum wäd grundleschnd räschdauriad! Dodefär hodmär schun 1995 dän "Dombauverein Speyer" gegrind. Bis Juni 2007 sin fär die Räschdaurierung 15,1 Millione Euro ausgäwwe worn un mär räschnd mid 26 Millione Euro bis 2015. SOURCE:WIKIPEDIA