Ambasadorja Kim në Vlorë: Të sundojë ligji që amerikanët të kenë besim të investojnë në Shqipëri
  • 4 years ago
Duhet të zbatohet ligji në mënyrë që bizneset amerikane të kenë besim dhe të investojnë në Shqipëri'. Ky është mesazhi që ambasadorja amerikane, Yuri Kim e dha nga Vlora.

Teksa e nisi ditën në qytetin bregdetar, diplomatja amerikane gjatë bashkëbisedimit me kryebashkiakun Dritan Leli e vuri theksin tek reforma në drejtësi. Kim tha se nëse zbatohen ligjet, atëherë e gjithë Shqipëria do të ecë përpara.

Kisha dëgjuar gjëra të bukura për Vlorën por duke ecur në rrugët e qytetit pashë që qyteti juaj ofron shumë. Teksa është kënaqësi për mua të shoh ndryshimet e Vlorës ndër vite. Nëse në Shqipëri zbatojmë gjërat që na rekomandohen, ligjet atëherë e gjithë Shqipëria do të eci përpara. Është tepër me rëndësi zbatimi i reformës në drejtësi në mënyrë që të sundojë ligji dhe amerikanët të kenë besim të investojnë në Shqipëri", ka deklaruar Kim.  

Nga ana e tij, kryebashkiaku Dritan Leli vlerësoi mbështetjen që SHBA i ka dhënë reformës në drejtësi dhe reformës elektorale.

"Vlerat që ju përcillni janë vlera që nxisin besueshmërinë tek demokracia. Unë ndjek si cdo qytetar me shumë vëmendje mbështetjen e jashtëzakonshme që qeveria amerikane i ka dhënë deri më sot reformës në drejtësi. mendoj që është pika më fondamentale për ti besuar vlerat dhe për të konsoliduar të ardhmen. Do të doja që pas reformës elektorale të kemi zgjedhje më të besueshme. Të kemi të zgjedhur me më shumë vlera, njerëz që e duan këtë vend", u shpreh Leli.
Recommended