Lleshaj: Thirrje për kryengritje! Organizatorët mund të përballen me akuza

Një protestë e dhunshme, e paligjshme, e rrezikshme dhe që goditi deri në rendin kushtetues të vendit. Kështu u shpreh një ditë pas protestës së dhunshme të opozitës, ministri i Punëve të Brendshme Sandër Lleshaj, teksa doli në një deklaratë për mediat. Duke bërë një krahasim me tetë protestat e mëparshme antiqeveritare të opozitës, këtë radhë -tha Lleshaj - pati më tepër dhunë, dhe më shumë persona të maskuar që nxitën dhe realizuan akte dhune. Zhvendosjen e protestës nga kryeministria, tek Parlamenti, ministri i Brendshëm e quajti një mënyrë tinëzare të organizatorëve që lejen në polici e kishin marrë për tubim vetëm para kryeministrisë.

"Protestë e dhunshme e paligjshme dhe e rrezikshme. Ishte një devijim i rëndë nga ligji, pati shumë më pak pjesëmarrës, gjë që përbën një lajm pozitiv se tregon që shqiptarët po kuptojnë se pas kujt nuk duhet të rendin dhe pas kujt duhet të shkojnë. Por pati shumë më tepër dhunë dhe tregon dëshpërimin e organizatorëve. Pati më tepër maska, dhe ndaj solli më tepër dhunë. U zhvendos në mënyrë tinëzare nga kryeministria, drejt parlamentit që ishte i boshatisur, duke krijuar pasaoja të rënda, duke përfshirë qytetarë të palidhur me protestën, duke sjellë dëme për biznese dhe mjete", tha ministri.