လှိုင်တက္ကသိုလ်နယ်မြေရှိ ရန်ကုန်ပညာရေးတက္ကသိုလ်လေ့ကျင့်ရေး အထက်တန်းကျောင်းကို ရန်ကုန်တက္ကသိုလ်ထံ လွှဲပြောင်းပေးသွားမယ်လို့ ရန်ကုန်တိုင်းဒေသကြီးလူမှုရေးဝန်ကြီးဦးနိုင်ငံလင်းက ပြောကြားလိုက်ပါတယ်။

ဒီကနေ့ ပြုလုပ်တဲ့လွှတ်တော်အစည်းအဝေးမှာ လှိုင်မြို့နယ်မဲဆန္ဒနယ်အမှတ်(၁)လွှတ်တော်ကိုယ်စားလှယ် ဦးကျော်ကျော်ထွန်းက ရန်ကုန်တိုင်းဒေသကြီးအတွင်းရှိ တက္ကသိုလ်တွေကိုပြုပြင်မွမ်းမံဖို့အစီစဉ်ရှိမရှိနဲ့ ယခင်ရန်ကုန်တက္ကသိုလ်လှိုင်နယ်မြေ RC-2ရှိ ပျက်စီးယိုယွင်းနေမှုတွေကို ပြင်ဆင်ဖို့အ စီစဉ်ရှိမရှိမေးမြန်းခဲ့တာပါ။

ရန်ကုန်တိုင်းဒေသကြီးအတွင်းမှာရှိတဲ့ တက္ကသိုလ်တွေက ဝေးကွာလွန်းတဲ့ လယ်ကွင်းတွေထဲမှာအလျင်အမြန်ဆောက်လုပ်ခဲ့ပြီး ထိန်းသိမ်းမှုအားနည်းတာကြောင့် သန့်ရှင်းမှုမရှိတာတွေ၊ တက္ကသိုလ်အဂါင်္ရပ်နဲ့မညီတာတွေကို တွေ့ရတယ်လို့ ဦးကျော်ကျော်ထွန်းက မေးခွန်းမေးမြန်းစဉ် ထည့်သွင်းပြောကြားခဲ့ပါတယ်။

တက္ကသိုလ်တွေကို ပြင်ဆင်ထိန်းသိမ်းရာမှာ နှစ်စဉ်ပြင်ဆင်ကြီးကြပ်မှုကော်မတီတွေဖွဲ့စည်းပြီး ပြင်ဆင်လျက်ရှိကြောင်း၊ သန့်ရှင်းရေးအတွက်လည်း လိုအပ်တဲ့နေရာတွေမှာ ဝန်ထမ်းတွေနဲ့ စနစ်တကျဆောင်ရွက်နေတယ်လို့ ဦးနိုင်ငံလင်းကပြောကြားခဲ့ပါတယ်။

ရုပ်သံသတင်းထောက်-အိမ့်မြတ်နိုးဇော်