ഇന്ത്യൻ ടീമിനൊപ്പം രണ്ട് സീരിസുകളിൽ ഉൾപ്പെട്ടെങ്കിലും ഗ്രൌണ്ടിലിറങ്ങാൻ കഴിയാതെ പോയ സഞ്ജു സാംസണിന്റെ പ്രതികാരമാണ് ഇന്നത്തെ കേരളാ രഞ്ജി മത്സരത്തിൽ മലയാളികൾ കണ്ടത്. തനിക്ക് അവസരങ്ങൾ നിഷേധിച്ച ഓരോരുത്തരോടുമുള്ള മറുപടി ബാറ്റ് കൊണ്ടാണ് സഞ്ജു നൽകിയത്.

തുംബ സെന്റ് സേവേഴ്യസ് ഗ്രൗണ്ടില്‍ നടക്കുന്ന രഞ്ജി ട്രോഫിയില്‍ ബംഗാളിനെതിരേ ആയിരുന്നു സഞ്ജുവിന്റെ ശതകം. 14 ബൗണ്ടറികളും ഒരു സിക്സറുമടക്കം 154 പന്തിൽ നിന്നുമാണ് സഞ്ജു 100 റൺസ് സ്വന്തമാക്കിയത്. ഇതിൽ ആദ്യ 50 റൺസുകൾ സഞ്ജു നേടിയത് വെറും 71 പന്തിൽ നിന്നാണ്.

ടീമിലെ പ്രധാന വിക്കറ്റ് കീപ്പാറായ ഋഷഭ് പന്ത് തുടരെ മോശം പ്രകടനം കാഴ്ച്ച വെച്ചപ്പോഴൊക്കെ ഒരു അവസരത്തിനായി സഞ്ജു സൈഡ് ബെഞ്ചിൽ കാത്തിരുന്നു. പന്തിന്റെ പ്രകടനത്തിൽ യാതോരു മാറ്റവും കണ്ടില്ല. തുടർച്ചയായ അവഗണനയുടെ മുള്ള് നെഞ്ചിലേറ്റി സഞ്ജു രഞ്ജി കളിക്കാനിറങ്ങി. സെഞ്ച്വറി അടിച്ച് തന്നെ അവഗണിച്ച സെലക്ടർമാർക്ക് മറുപടിയും നൽകി.