Report TV -Basha i shkon në zyrë Kryemadhit dhe 'tërhiqet' nga dialogu

Ndërsa aleatët e tij kishin zbutur tonet, duke lënë të nëkuptuar mundësinë e një tryeze dialogu mes të gjitha palëve, edhe Lulzim Bashës dhe Edi Ramës, teksa ky i fundit mban postin e kryeministrit, lideri demokrat ka bërë një kthesë të fortë kundër këtij dialogu, duke thënë se nuk do të niste kurrë këtë proces, nëse më parë Rama nuk heq dorë nga posti i kreut të qeverisë.

Edhe pse largimi i Edi Ramës dhe krijimi më tej i një qeverie tranzitore, ishte qëllimi final, aleatët lanë të hapur mundësinë që dialogu të niste nën organizimin e një tryeze nga Presidenti Ilir Meta, për të diskutuar pikat që mund ta çojnë vendin në zgjedhje përmes një qeverie kujdestare me dakordësinë e të gjitha partive politike.

Por sot, teksa i shkoi në zyrë kryetares së Lëvizjes Socialiste për Integrim, Monika Kryemadhit, pas 1 ore, në një prononcim për gazetarët, kryedemokrati Lulzim Basha u shpreh i vendosur: "Asgjë nuk ka ndryshuar në qëndrimin e opozitës dhe koalicionit politik, të mazhorancës së re, largimi i Edi Ramës, është kusht i panegociueshëm për të hapur rrugën e dialogut politik për një qeveri tranzitore që të organizojë zgjedhje të lira dhe të ndershme. Asgjë nuk ka ndryshuar në qëndrimin tim, rivizitoni qëndrimet tuaja".